Alargada representación do Campus do Mar e do CIM na “Atlantic Stakeholder Platform Conference – ASPC 2021” celebrada en Irlanda

Na semana pasada celebrouse en Dublín, Irlanda unha nova edición da conferencia anual  “Atlantic Stakeholder Platform”. Tras a edición virtual do ano pasado, este ano a conferencia transcorreu nun formato mixto, presencial e online.  Neste evento a Universidade Vigo estivo representada por Tania Tato, project manager do proxecto Bluebiolab e Cristina Quelle, coordinadora de I+D+i do CIM-Uvigo. No transcurso das xornadas foron presentados diversos proxectos liderados e participados polo Campus do Mar como Bluebiolab, Sherpa do Mar, financiados a través do programa Interreg-POCTEP, e o proxecto European Blue Biobank que liderou o CIM, e que  foi financiado polo programa Interreg- Atlantic Area.

O centro de Convencións da capital irlandesa foi o espazo que acolleu o acto central da xornada, e onde foron entregados os premios anuais aos proxectos máis destacados no ámbito mariño realizados no espazo atlántico. O Bluebiolab foi un dos proxectos seleccionados pola organización para realizar unha presentación dos resultados acadados. No transcurso da xornada, a xestora do proxecto, Tania Tato, realizou un pitch ante un panel moderado por Catherine Frideres (Atlantic Assistance Mechanism) e do que formaban parte Brian Marrinan (socio xeral, Equipe ABC), Ruben Eiras (secretaria-xeral do Forum Oceano) e Ella Nilakanthi Ford (consultora de xestión global, autora de publicacións e líder empresarial). Durante a súa intervención, Tato explicou os principais obxectivos do proxecto Interreg-POCTEP BLUEBIOLAB, destacando as conquistas do Laboratorio Transfronteirizo até o momento. Após a presentación, respondeu ás cuestións colocadas polos diferentes membros do xurado.

Ao tempo, a delegación da Universidade de Vigo participou no taller Boosting Knowledge and Skills for a Sustainable Blue Economy. Por outra parte, María Huete, project officer do EMBRC-ES, participou, en formato virtual, no workshop Making the Most of Natural and Marine Resources for the Benefit of the Atlantic Regions, onde deu a coñecer os resultados  atinxidos no European Blue Biobank, proxecto do European Marine Biological Resource Centre e que foi liderado polo CIM.

Por último, o proxecto Sherpa do Mar que lidera o grupo Rede e no que participa o Campus do Mar, difundiu información do proxecto a través dun stand virtual facilitado pola organización.

 



Web y subwebs financiadas por:

Proyecto financiado por el Ministerio de Educación en el marco del programa Campus de Excelencia Internacional y por el Ministerio de Economía y Competitividad, dentro del Plan Nacional de Investigación Científica, Desarrollo e Innovación Tecnológica.

X