06 Mar CIM e Campus do Mar levan a ciencia mariña a máis de 600 escolares do interior da provincia de Pontevedra

O Centro de Investigación Mariña (CIM) da UVigo e o Campus do Mar pecharon con éxito unha nova edición do seu programa de alfabetización oceánica, que achegou a ciencia mariña a 616 escolares de 13 centros educativos do interior da provincia de Pontevedra.

Esta edición puxo o foco en levar o coñecemento do océano a concellos onde o mar non forma parte da contorna cotiá do alumnado. O obxectivo foi reducir a fenda territorial no acceso á cultura científica e garantir que as nenas e nenos do interior comprendan que o océano é esencial para regular o clima, producir gran parte do osíxeno que respiramos e soster a alimentación e a economía a escala global.

Experimentos e dinámicas interactivas

A través de obradoiros prácticos, experimentos adaptados á educación primaria e dinámicas participativas, trasladáronse conceptos sobre biodiversidade mariña, impacto do cambio climático, contaminación e sostibilidade dos recursos mariños. Deste xeito, os cativos e cativas tiveron a oportunidade de coñecer os sete principios da alfabetización oceánica, comprendendo o papel esencial do océano na vida e no clima, a súa influencia nos ecosistemas e nos seres humanos, a necesidade da súa exploración e conservación, así como a responsabilidade da sociedade no seu coidado. As sesións combinaron cinco actividades manipulativas para fomentar a aprendizaxe experiencial, ademais de experimentos científicos para ilustrar conceptos clave como a biodiversidade mariña, as correntes oceánicas, a salinidade ou o impacto do cambio climático nos ecosistemas mariños. 

Máis aló da divulgación, o programa reforza o compromiso do CIM, que é membro da Rede CIGUS, e do Campus do Mar coa conexión entre investigación e sociedade, consolidando unha liña estratéxica centrada na igualdade de acceso ao coñecemento científico e na construción dunha cidadanía máis informada e comprometida co coidado do océano.

Actividade enmarcada na Década dos Océanos

Esta iniciativa, realizada co apoio da Xunta de Galicia, enmárcase na Década dos Océanos para o Desenvolvemento Sostible (2021-2030), promovida pola ONU para frear o deterioro dos ecosistemas mariños e fomentar novas oportunidades de desenvolvemento sostible. Así mesmo, está aliñada co programa Ocean Literacy for All da UNESCO, que busca aumentar a conciencia global sobre a conservación, restauración e uso sostible dos océanos, así como coa plataforma EU4Ocean da Comisión Europea, enfocada na promoción da Alfabetización Oceánica.